Rematou a convención do Partido Republicano dos Estados Unidos cun discurso en que o seu candidato, Donald Trump, empregou máis tempo en desvalorizar o rival, Joe Biden, e en espallar o medo sobre a eventual vitoria dos demócratas que en falar dos seus plans para un segundo mandato.

Dixo que Biden é débil e que a súa presidencia ameazaría a economía, a seguridade, a maneira de vivir e o soño americano.

Donald Trump defendeu a súa controvertida xestión da pandemia centrada, dixo, na ciencia, nos feitos e nos datos.

O coronavirus ocasionou xa máis de 180.000 falecementos nos Estados Unidos e achégase aos 6 millóns de contaxios, máis que en ningún outro país do mundo.