Desafortunadamente, desde que comezou ás tres da tarde o dispositivo especial de Tráfico do Pilar xa houbo tres accidentes en Santiago, Vilagarcía e Monterroso. Prevese moito movemento porque esta é a primeira operación saída sen restricións de mobilidade pola covid,  que previsiblemente vai aumentar os movementos tanto de entrada como de saída da comunidade. 

A previsión da Dirección Xeneral de Tráfico é de máis de 650.000 desprazamentos con orixe ou destino Galicia nesta ponte festiva do Pilar, a primeira operación saída deste último ano sen restricións de mobilidade pola covid. A estes movementos cómpre sumarlles os milleiros que se están a rexistrar xa este venres entre concellos galegos.

En total, de hoxe ás tres da tarde á medianoite do martes 12, Tráfico calcula que haberá máis de 7 millóns de desprazamentos sumando os das estradas de Galicia, León e Asturias, o 9 por cento do total do Estado.