O Diario Oficial de Galicia ratifica o endurecemento das medidas anticovid na Laracha e Vilalba, localidade na que se rexistrou un importante gromo no Asilo e na que o informe de Saúde Pública no que sustenta a decisión fai constar que a porcentaxe máis alta de casos positivos dáse en grupos de idade avanzada, nos que a enfermidade pode ter consecuencias máis graves. 

Así o ratifica a orde do DOG publicada este venres que modifica a do 4 de novembro para rebaixar as medidas restritivas do Carballiño (Ourense), pola mellora da súa situación, e endurecer as limitacións na Laracha (A Coruña) e Vilalba (Lugo), localidades que suman á listaxe de 69 municipios galegos con peche perimetral e da hostalaría. 

No caso de Vilalba, o DOG recolle que Saúde Pública constatou un incremento da taxa acumulada de casos positivos en covid-19, e varios factores de risco. Por exemplo, apúntase que "a porcentaxe máis alta de positividade alcánzase no grupo de idade de 70-79 anos, máis de 80 anos e no de 60-69 anos, grupos de idade nos que a enfermidade pode ser especialmente grave". Apúntase, ademais, que os grupos de idade coas taxas máis altas son "de 15-19 anos, 20-24 anos e de 70-79 anos". Entre os 15 e os 24 anos a infección, remarca Saúde Pública, pode ser asintomática ou paucisintomática, favorecendo a transmisión e dificultando o control.

Con respecto ao caso da Laracha, Saúde Pública argumenta que os indicadores de xestión do gromo da comarca de Bergantiños evidencian valores de alto risco, como a incidencia media a tres días, ou a porcentaxe de PCR positivas entre os contactos estreitos dun caso confirmado.

A orde do DOG que ratifica o endurecemento das medidas en Vilalba e A Laracha ten efectos desde as 00.00 horas deste sábado.