O número de casos positivos de coronavirus no brote detectado esta semana na comarca da Mariña ascende xa a 18 persoas, que son catro máis das que había na xornada de onte, segundo informa o Sergas.

O epicentro dese rebrote sitúase nunha reunión familiar que tivo lugar no municipio de Xove e o primeiro caso foi detectado este martes, día 21 de xuño, cando un dos participantes nesa celebración recorreu aos servizos sanitarios ao presentar síntomas compatibles co coronavirus.

O outro núcleo do brote estaría no concello de Burela. Como medida temporal suspendéronse as visitas nas residencias de maiores de toda a comarca e iniciarase por estes centros o segundo cribado de prevención. "Anulábamos as visitas pero non porque haxa indicios de relacion dalgun caso coas residencias, senon porque estamos facendo o cribado das residencias", explica Jesús Vázquez Almuiña, conselleiro de Sanidade.

A Plataforma de Vixilancia e Control Epidemiolóxico e os Servizos de Medicina Preventiva e Saúde Pública do Sergas continúa rastrexando os posibles contactos dos contaxiados e, a día de hoxe, sempre segundo as mesmas fontes, foi realizado ao redor dun cento de probas PCR.

De momento non foi identificado o foco dese contaxio, aínda que as investigacións continúan para determinar "se foi provocado por un caso importado ou estamos ante unha situación de transmisión comunitaria".

En todo caso, a maioría dos infectados son membros dunha mesma familia, achegados ou persoas que estiveron en contacto con eles.

A maioría das persoas que deron positivo están asintomáticas ou presentan cadros moi leves. De feito, só unha persoa permanece ingresada no Hospital dá Mariña por covid-19.

As autoridades lembran que o virus segue entre nós e piden non relaxar as medidas sanitarias de prevención.

"Isto foi un baño de realidade, sabemos que o virus está entre nós, que se contaxia facilmente e hai que tomar todas as medidas de precaución", di Demetrio Salgueiro, alcalde de Xove.

Galicia pediralle ao Goberno os datos das persoas que chegan á comunidade para facer un seguimento segundo o seu país de orixe.

A Xunta solicita ser informada de todas as persoas que chegan a Galicia que entran "ben por porto ou aeroporto", segundo manifestou o conselleiro de Sanidade.

O primeiro brote rexistrado en Galicia, o da comarca do Barbanza, está controlado. O balance segue a ser de 9 casos positivos.

A día de hoxe, hai 31 casos activos de coronarivus na provincia de Lugo, catro máis que onte.