O presidente da Xunta Alberto Núñez Feijóo reafirmouse este mércores nas súas políticas á fronte da Xunta e desdeñou o "proxecto inexistente e rexeitado nas urnas" do PSdeG liderado por Gonzalo Caballero e o da Galicia "minoritaria" que representa Ana Pontón, a voceira nacional do BNG. 

Na sesión de control no Parlamento, os líderes da oposición sinalaron que as políticas de Núñez Feijóo, agravadas durante a crise, supuxeron recortes, retrocesos e parálises na industria, nos servizos públicos e nas oportunidades para distintos colectivos, entre eles, os mozos, denunciaron tanto Caballero como Pontón.

Núñez Feijóo asegurou que lle sorprende que Caballero siga sendo o secretario xeral do PSdeG, aínda que afirmou que non ten "ningún interese en que deixe de selo" e reclamoulle "sentido común" e que "acepte a realidade".

A Pontón recriminoulle que non lle interese o país, "senón ese país minoritario que representa", mentres que a el lle interesa e defende "o país no seu conxunto" como presidente galego. 

Ana Pontón censurou as políticas da Xunta destinadas aos mozos, porque implican "paro, precariedade e negación" para este colectivo, polo que reclamou un Plan de emprego xuvenil, políticas de captación e retención de talento, de vivenda, e tamén que use os fondos Next Generation para que "os galegos non teñan que emigrar". 

Núñez Feijóo destacou que desde 2009 descendeu "un 65 % o paro xuvenil" en Galicia e sinalou que o saldo poboacional é "positivo" en máis de 70.000 persoas de modo xeral nese período, "16.000 delas entre os mozos", polo que reprochou á líder do BNG que faga formulacións lúgubres" do país.

Na súa intervención, Gonzalo Caballero reprochou a Núñez Feijóo a deterioración dos servizos públicos e da economía, que se agravou coa pandemia, e acusou ao presidente galego de "dar as costas aos cidadáns e aos concellos". 

Caballero lamentou que a Xunta tivese seis meses "gardados baixo o colchón" 115 millóns dun fondo previsto nos orzamentos e afirmou que o Goberno galego "recibiu máis de mil millóns de diñeiro extraordinario" por parte do Goberno, polo que concluíu que o Executivo autonómico carece de ideas e non sabe gastar. 

"Vostede non quere aceptar a realidade", replicou Núñez Feijóo, que insistiu en que o Goberno "deixou de transferir a Galicia 828 millóns de euros por razóns ideolóxicas e partidistas" e tachou de "falsidade" que o Executivo destinae "máis de mil millóns" á comunidade, xa que deses fondos "pagaron 31 millóns".