O presidente da Xunta defendeu este mércores a estratexia de inmunización da Xunta, pero recoñeceu que ten "carencias", coma no resto de España, sobre todo, pola “falla de vacinas".

"Ninguén pode dar o que non ten, non podemos vacinar sen vacinas", afirmou Alberto Núñez Feijóo na sesión de control do Parlamento galego. Do mesmo xeito, volveu subliñar que "todos os maiores de 80 anos, salvo algunha excepción" estarán vacinados "entre finais de abril e principios de maio".

Ademais, asegurou que esta semana Galicia será "a primeira" comunidade en expedir un certificado de vacinación e instou ao secretario xeral do PSdeG, Gonzalo Caballero, a que o Goberno non recorra esta medida, como fixo coa Lei de Saúde aprobada na Cámara autonómica.

Gonzalo Caballero obviou este tema, aínda que nunha intervención posterior o deputado socialista Julio Torrado asegurou que Andalucía e Castela e León xa expiden un certificado de vacinación.

O líder dos socialistas galegos cuestionou "o atraso" comparativo de Galicia con outras autonomías no canto á vacinación deste grupo prioritario, "a terceira pola cola" co "92,5 %" de inmunización.

Segundo Caballero, hai "17.000" maiores de 80 anos que aínda non recibiron ningunha dose, polo que animou o presidente galego a recoñecer as carencias do seu plan e a "colaborar" e non "confrontar" co Goberno central.

Deste xeito, pediu a Núñez Feijóo que retire a Lei de Saúde "anticonstitucional", recorrida polo Goberno ante o tribunal de garantías, e a pactar un novo texto.

"Vostede é o presidente do Tribunal Constitucional? Sabe o que vai decidir?", preguntoulle Núñez Feijóo a Caballero, e reivindicou as súas "competencias" como presidente autonómico para defender "os intereses dos galegos".

O presidente da Xunta insistiu en que todos os maiores de 80 anos "localizados" inmunizáronse, salvo "un 3 %" que rexeitou a vacina e un grupo de grandes dependentes que se inocularán nos próximos días.

Ademais, acusou a Caballero de "mesturar datos", xa que Galicia ten "máis persoas inmunizadas que a media de España", e tachou o líder socialista de "deputado inútil" para defender os intereses autonómicos, unha idea que posteriormente aplicou á deputada nacionalista Ana Pontón.

Na sesión de control, ademais, quen tachou de "incapaz" a Núñez Feijóo foi a portavoz nacional do BNG. Asegurou que Galicia perdeu "centenares de millóns" de euros por culpa da Xunta.

Pontón cifrou en 289 millóns de euros os fondos que Galicia deixou de percibir "pola incapacidade" e a "submisión" do Goberno galego para defender os intereses autonómicos. Tamén  expresou o seu "temor" a que esta actitude poida ser "a antesala" do que ocorra coa parte dos 72.000 millóns de axudas directas dos fondos europeos Next Generation.

A dirixente nacionalista reclamou para Galicia 12.600 millóns de euros destes fondos, aínda que afirmou que quedará "lonxe desa cifra" e que a cantidade recibida acabará "en mans dun puñado de multinacionais".

Núñez Feijóo afirmou que leva doce anos comportándose do mesmo xeito ante o Goberno central de quenda, "con lealdade institucional, denuncia dos incumprimentos e negociación se é posible".

"Lealdade non significa submisión, nin denunciar incumprimentos do Goberno significa confrontación. PSdeG e BNG consideran que non cumpro o meu deber por razóns opostas e iso fai darme conta de que cumpro a machada as miñas obrigas como presidente autonómico", defendeu.

"A historia xulgará quen defende os intereses de Galicia e quen a súa ideoloxía e os seus intereses orgánicos", espetoulle Núñez Feijóo á líder do BNG. Ademais, censurou que a súa visión da comunidade sexa "limitada" e lembroulle que as súas propostas foron desestimadas por "gran parte" do electorado o 12 de xullo pasado en detrimento das defendidas polo PPdeG, concluíu.