Galicia non rexistrou ningún falecemento relacionado co coronavirus nas últimas 48 horas, daquela, a cifra total de falecidos mantense en 607. O último caso que se coñeceu foi, este domingo, o dun home de 88 anos ingresado no Hospital La Rosaleda, en Santiago de Compostela, que tiña patoloxías previas.

Esta é a cuarta xornada desde o inicio da alerta sanitaria sen mortes por coronavirus rexistradas na comunidade e a primeira vez que ocorre dous días seguidos.

O número de mortes rexistradas en atención hospitalaria son 475: 126 na área sanitaria da Coruña, 101 na área de Ourense, 91 na área de Vigo, 85 na área de Santiago, 30 na área de Ferrol, 26 na de Lugo (dúas deles en atención domiciliaria) e 16 en hospitais da área de Pontevedra. A estas defuncións hai que sumar as 132 producidas dentro das residencias de maiores.

En todo caso, hai que ter en conta que, dos falecidos en atención hospitalaria, hai 138 persoas que estaban vinculadas con centros residenciais (e que morreron en hospitais ou en residencias integradas). A respecto disto, os falecidos relacionados con residencias son 270, o cal supón ao redor do 45% do total de vítimas mortais do coronavirus en Galicia.

Nas últimas 24 horas, contáronse só dous novos contaxios. A cifra total de casos activos en Galicia sitúase en 1.136. En total, deron positivo en PCR 9.058 persoas.