Santiago parece xa o de sempre con centos de turistas e peregrinos ateigando a rúa do Franco. Ata o de agora estaba sendo un bo verán.

"Xullo foi marabilloso, de verdade que si", conta ​Eladio Diéguez, encargado dunha tenda de produtos típicos.

"Este mes, fenomenal; este mes, moi ben, está vindo xente que non podemos atender pola ocupación", apunta ​Carmen Iglesias, hostaleira.

Comerciantes e hostaleiros do Franco saben que os turistas son a súa fonte de vida, por iso piden responsabilidade á xente.

"Nosoutros vivimos só do turismo. Se aquí poñen calquera tipo de restrición, o turismo baixa e xa nós nos vemos afectados polo menos nun 50% das ganancias", explica Eladio.

"Pois se soben o nivel de restricións, a nós no sector da hostalería amólanos bastante, ao reducir é moi inviable a situación", fala ​Luís Iglesias, camareiro.

"Saquei unhas persoas do ERTE que quedaron moi agradecidas e non me gustaría volvelas a meter de novo, de verdade", laméntase ​Carmen.

"Estamos algo preocupados, confiamos en que a xente teña memoria, que non se esquezan do ano pasado e que pensen un pouco nos demais, que non sexan tan egoístas, porque todos temos ganas de saír, todos sabemos saír e gozar", explica ​Carlos Rodríguez, comerciante do Franco.

Santiago ten hoxe 607 casos activos, máis da metade detectáronse na última semana, a semana que debera ser a máis grande das súas festas.