O brote da covid-19 na comarca ten agora case un cento de casos activos, 99 casos para sermos exactos. Imos á zona. A nosa compañeira Ana Castro está nun dos límites que restrinxirán o acceso a partir das doce desta noite. 

Esta tarde o DOGA publicará as novas medidas restritivas para os 14 concellos que compoñen o distrito sanitario da Mariña, e límites coma este en que estamos xa non os poderemos cruzar agás por causa xustificada. Como por exemplo, ir traballar. A mobilidade dentro dos 14 concellos está permitida, pero recoméndase á poboación facer unicamente aqueles desprazamentos imprescindibles.

Outra das medidas que entran en vigor esta medianoite para dar por controlado o rebrote da Mariña é a limitación da ocupación nos locais ao 50 %, tamén en bares e restaurantes, comercios, bibliotecas e museos. E,  moi importante: o uso da máscara; será obrigatoria nada máis saír da casa. Tamén en praias e piscinas, onde soamente poderemos quitala no momento do baño.

O brote da Mariña ten 99 casos activos, despois de que sete deles recibiran a alta nas últimas horas.