O 'Diario Oficial de Galicia' actualizou este martes a listaxe de territorios incluídos no rexistro obrigatorio de viaxeiros, en que a Consellería de Sanidade incluíu Cantabria, Castela-A Mancha e Melilla no deber de comunicar as chegadas á comunidade galega, novidades con respecto a hai dúas semanas (período de actualización da listaxe).

Desta maneira, os viaxeiros que estivesen nalgún dos lugares da listaxe nos 14 días anteriores deben comunicar, nun prazo máximo de 24 horas, os seus datos de contacto e estancia a través da web https://coronavirus.sergas.gal/viaxeiros ou do teléfono 881 00 20 21. Así as cousas, están incluídos, dentro do ámbito estatal, os seguintes territorios: Baleares, Cantabria, Castela-A Mancha, Ceuta, Estremadura, Melilla, País Vasco e A Rioxa.

De países de Europa, a listaxe pasa de nove territorios a 26. Son agora: Albania (novo), Acerbaián (novo), Bulgaria (novo), Chipre, Eslovenia (novo), Estonia (novo), Francia, Grecia (novo), Islandia, Irlanda (novo), Illa de Man, illa de Xersei, Kosovo (novo), Liechtenstein (novo), Lituania (novo), Macedonia do Norte (novo), Mónaco, Montenegro (novo), Portugal (novo), O Reino Unido, San Mariño (novo), Serbia (novo), Suíza (novo), Turquía (novo), Xeorxia e Xibraltar.