Un 9 % dos locais de hostalería que os inspectores de Sanidade visitaron na semana do 15 ao 21 de marzo incumpría as medidas anticovid−19.

Das inspeccións realizadas durante esa semana do festivo de San Xosé na hostalería de Galicia os inspectores de Sanidade atoparon deficiencias menores nun 30 %, e nun 9 % incumpríanse as normas anticovid−19 establecidas para o sector. Nos establecementos de alimentación, o número de incidencias menores en supermercados, hipermercados e ultramarinos foi do 18 %. 

No conxunto de inspeccións realizadas na semana do 15 ao 21 de marzo en todos os establecementos, os incumprimentos máis salientables foron non dispoñer de xel de mans ou non respectar a ocupación máxima establecida para cada local. Nesa semana, os inspectores de saúde pública da Consellería de Sanidade realizaron preto de 1.150 visitas a instalacións deportivas, establecementos de alimentación e hostalería. Controlaron sobre todo o cumprimento de ocupacións, distancias, o uso de máscaras e as medidas de hixiene.

Segundo os datos da Consellería de Sanidade, o 9 % dos locais de hostalería de Galicia visitados polos inspectores incumprían as normas anticovid−19 mentres no 30 % se detectaron deficiencias menores. No caso do sector da alimentación, o grao de cumprimento das medidas de seguridade para reducir a incidencia da covid−19 foi do 59 %, e reducíronse as deficiencias menores ao 18 %.

Na terceira semana de marzo, no total das visitas de inspección, o 40 % dos incumprimentos foron por non ter xel de mans ou non telo debidamente rexistrado para o uso; seguiron as infraccións por non respectar a capacidade máxima do local. A maior parte dos incumprimentos, un 75 %, rexistráronse no sector da restauración.