O conselleiro de Sanidade, Julio García Comesaña, fixo un chamamento á cidadanía sen vacinar para participar este domingo na convocatoria aberta nas diferentes áreas sanitarias e sen necesidade de cita. Segundo dixo, o obxectivo é "seguir sumando" e avanzando para alcanzar o cen por cento da poboación inmunizada.   

Este sábado recibiron a segunda dose menores de entre 12 e 14 anos que participaron no proceso hai 26 días. En paralelo, Sanidade mantén o proceso de repesca, con convocatorias abertas e posibilidade de pedir a cita. 

Comesaña lembra que a de hoxe será "practicamente das últimas" convocatorias tendo en conta que o Goberno está a traballar xa "na terceira dose". As persoas que se animen a acudir aos puntos de vacinación e non queiran agardar poden pedir cita a través da aplicación do Sergas.

O conselleiro reivindicou os datos de inmunización de Galicia, "a comunidade con maior porcentaxe de primeira dose" posta, asegurou, ao alcanzar o 93 % .