A ponte dos Santos xa non separa nin supón un límite, senón que une de novo Galicia e Asturias tras o levantamento do estado de alarma e a fin dos peches perimetrais.

O intercambio de veciños notárono especialmente en Ribadeo onde o comercio abre os domingo e a vila converteuse nun punto de encontro.

A chegada dos veciños asturianos tamén foi moi ben acollida polos hostaleiros.

O impacto do occidente asturiano en Ribadeo é moi alto. Supoñen máis da metade dos seus clientes.

Uns e outros estaban desexando cruzar dun lado a outro da ría. Era importante a nivel económico pero tamén sentimental e familiar.

Agora agardan que os reencontros sexan para quedar e que a súa emblemática ponte non os volva separar.