O corpo do tripulante desaparecido nas proximidades de Porto Meloxo, no Grove (Pontevedra), foi recuperado este venres, informaron Salvamento Marítimo e o 112 Galicia.

En concreto, o cadáver de Ramiro Piñeiro Lago, de 43 anos, foi localizado por embarcacións particulares que participaban no dispositivo de busca preto da ponte da Illa de Arousa.   

O home saíra a pescar ás doce da noite e non regresou ao seu domicilio. A súa embarcación apareceu á deriva este venres pola mañá.   

Para tratar de localizalo púxose en marcha un operativo integrado por persoal de Gardacostas, Salvamento Marítimo, Servizo Local de Emerxencias do Grove, Protección Civil de Vilanova, Policía Local e Garda Civil.   

Segundo indicaron as mesmas fontes, que sinalan que se están investigando as circunstancias do suceso, o corpo está a ser trasladado a Vilanova de Arousa, localidade natal do mariñeiro.