Un caixeiro dentro da sucursal de Caixa Rural na localidade lucense de Castro de Ribeiras de Lea, no concello de Castro de Rei, rexistrou unha exploxión na madrugada deste xoves.

O suceso tivo lugar arredor das 4:00 horas da madrugada na oficina situada no centro da localidade. Nesta sucursal o caixeiro está no interior, e malia que conseguiron forzar a porta de acceso, non a deron aberto de todo. Tampouco deron levado o depósito dos cartos que había no caixeiro, polo que, a priori, non conseguiron diñeiro no asalto. Con todo, aínda falta por abrir este depósito, xa que os propios empregados da caixa tampouco tiveron acceso a el.

Non hai danos persoais, pero o edificio da sucursal ten enriba un piso habitado. As persoas que viven nel están ben, pero a explosión puido causar danos irreparables. Hai cuantiosos estragos materiais e a onda expansiva desprazou portas e ventás á beirarrúa e á estrada. Malia que parece que non, está por ver se quedou afectada a estrutura do edificio. Membros do Tedax desprazáronse este xoves ao lugar para tentar esclarecer os feitos.

Nesta sucursal hai dous empregados que irán traballar a outras oficinas mentres non se repara a desfeita, unhas obras que se calcula que durarán dúas semanas. A directora presentou esta mañá a denuncia polo asalto no cuartel.

Este suceso prodúcese un día despois de que rebentaran un caixeiro no municipio coruñés de Oza-Cesures. Ademais, na propia comarca da Terra Chá ocorreron feitos similares, como no veciño concello da Pastoriza, onde tamén fixeron explotar un caixeiro a principios de maio.