O expresidente do Goberno Mariano Rajoy considera que a sentenza do Tribunal Supremo sobre o caso Gürtel supón unha "reparación moral" ante unha moción de censura que ao seu xuízo se construíu "sobre a base dunha enorme manipulación dunha sentenza que non é firme e ademais ten un voto particular".

Rajoy emitiu este xoves un comunicado en que valora a sentenza do Tribunal Supremo, que onte ratificou que o PP se lucrou da corrupción da Gürtel pero advertiu das "excesivas" alusións da Audiencia Nacional á "caixa  B" do partido, xa que a formación non foi xulgada por estes feitos.

O expresidente lembra no seu texto o discurso que pronunciou o 31 de maio de 2018, cando se debateu a moción de censura presentada por Pedro Sánchez que acabou co seu Goberno. Entón afirmou que a sentenza de Gürtel non condenaba "o Goberno de España nin o seu presidente nin ningún dos seus membros, non condena a ningún militante do Partido Popular" e que tampouco recollía "ningunha condena penal contra o Partido Popular".

"Toda a xustificación da moción de censura está construída sobre a base dunha enorme manipulación dunha sentenza que non é firme e ademais ten un voto particular", dixo entón e lembra este xoves.

O expresidente do Goberno agradece o apoio dos españois e dos militantes do PP e confía en que "esta reparación moral os anime a seguir traballando polo benestar, as liberdades e a concordia entre españois", valores que percibe "máis necesarios que nunca".