O Tribunal de Apelación de Sassari (Sardeña, Italia) decidiu este venres deixar en liberdade ao expresidente de Cataluña Carles Puigdemont, que foi detido este xoves en L'Algher en virtude dunha orde do Tribunal Supremo español, aínda que non poderá abandonar a illa, informou o seu avogado en Italia, Agostinangelo Marras.

O xuíz considerou que o seu arresto onte no aeroporto de L'Algher se realizou de acordo coa lei, pero decidiu deixalo en liberdade, coa única imposición de que non abandone Sardeña durante uns días, ata que decida sobre a súa situación.

Puigdemont, que interveu na vista telematicamente e sobre o que pesa unha a orde europea de detención e entrega cursada polo Tribunal Supremo por un delito de sedición e malversación, abandonará previsiblemente nas próximas horas a prisión de alta seguridade de Sassari en que se atopa encarcerado.

O xefe da Oficina do expresidente da Generalitat, Josep Lluís Alay, asegurou que o Ministerio Fiscal non pediu "ningún tipo de medidas cautelares" contra Puigdemont, e que agora deben esperar que o xuíz dite a súa saída inmediata de prisión.

"A boa noticia é que o presidente sairá hoxe mesmo da prisión e terémolo en l'Algher, celebrando o 'Aplec internacional de Adifolk', a pesar deste pequeno atraso que ocasionou de novo o Tribunal Supremo", subliñou Alay.   

Con todo, concretou que o proceso de extradición contra Puigdemont segue adiante e que as autoridades italianas deben ver se a orde se adecúa ou non ao que dixo o Tribunal de Xustiza da UE de Luxemburgo. "Pero mentres tanto o presidente é libre", dixo.

Á espera da decisión definitiva da xustiza italiana sobre a situación do expresidente de Cataluña, o xuíz do Tribunal Supremo, Pablo Llarena, que instrúe a causa contra el, remitiu ás autoridades transalpinas a euroorde emitida o 14 de outubro de 2019 contra Carles Puigdemont por sedición e malversación, así como tamén a cuestión prexudicial presentada ante o Tribunal de Xustiza da Unión Europea.

Llarena enviou un oficio ao representante español en Eurojust para que remita eses documentos ao Tribunal de Apelación de Sasasri. Nese escrito, o maxistrado deixa claras unhas serie de cuestións: a Orde Europea de Detención e Entrega está "actualmente en vigor" e que o procedemento xudicial do que deriva a euroorde "está activo e pendente da captura dos procesados en situación de rebeldía".