O expresidente da Generalitat Carles Puigdemont formalizou este xoves a súa vontade de crear un novo partido que aglutine "a corrente central do catalanismo" independentista e avanzar na vontade de exercer o dereito á autodeterminación. Así o anunciou nun comunicado na súa conta de Twitter, en que convoca a asemblea para constituír esta nova formación o sábado 25 de xullo.

Carles Puigdemont convida a sumárense á nova formación a todos aqueles que queiran "o mellor para o país". Entre os que asinan o texto figuran os exconsellers presos Jordi Turull, Josep Rull e Joaquim Forn; o exlíder da Assemblea Nacional Catalá Jordi Sànchez, e algúns consellers do actual Govern, como Meritxell Budó e Damià Calvet. 

Ens comprometem a fer de Junts per Catalunya una eina transversal, plural i eficaç al servei de la república catalana i de les persones. T’esperem el dia 25 per començar a caminar junts. #Jotambéhiseré pic.twitter.com/ut4SwT4B9t

— Carles Puigdemont (@KRLS) July 2, 2020

Dáse a circunstancia de que a marca electoral de JxCat, que creou Carles Puigdemont, tena rexistrada o PDeCAT -a formación herdeira de CDC-, daquela o expresidente catalán verase obrigado a usar outras siglas para o novo partido se, como todo parece indicar, non hai acordo co Partit Demòcrata.

Tras meses de negociacións sobre cal debe ser o futuro do espazo posconverxente, o manifesto reivindica que chegou "a hora da xenerosidade e a responsabilidade, de abandonar tensións estériles e miradas demasiado a miúdo egocéntricas e enfocadas ao pequeno espazo de cada un". Neste sentido, reivindican que hai que saír "da zona de confort" para non "perder" o que se gañou nos últimos dez anos de procés.