O PSOE e ERC volvéronse a reunir este venres dentro das negociacións para tentar un acordo que permita a investidura do presidente en funcións, Pedro Sánchez, que o Goberno considera que é posible que se produza antes de Reis porque hai "tempo físico". Ambos partidos confirmaron dita reunión entre os equipos negociadores, e que segundo os republicanos foi de "contacto e sen novidades relevantes".

Esta foi entón a cuarta reunión desde que ambos iniciaron un proceso de diálogo encamiñado a conseguir a abstención de ERC, aspecto esencial para que a investidura de Sánchez sexa viable tal e como está a aritmética parlamentaria no Congreso que saíu das eleccións do 10 de novembro. Pero as negociacións están pendentes do informe que presente a Avogacía do Estado sobre a situación xudicial do líder de ERC, Oriol Junqueras, despois de que a xustiza europea ditaminara que gozaba de inmunidade tras ser elixido eurodeputado.

A portavoz do Goberno, Isabel Celáa, lembrou que a Avogacía do Estado ten de prazo ata o 2 de xaneiro para presentar ese escrito, no que os republicanos reclaman un "xesto" con Junqueras para facilitar a investidura. Celaá expresou a súa esperanza de que o vindeiro luns poidan estar listas esas alegacións, de modo que aínda daría tempo para que a votación de investidura se celebrase antes do 6 de xaneiro, aínda que, iso si, preferiu non adiantar unha data concreta.