A situación é excepcional e as medidas de seguridade tamén.
O protocolo inclúe para os membros das mesas toma de temperatura, máscaras FFP2, pantalla facial, separadores e luvas para o reconto de votos.
Tamén deberán vestir un equipo de protección individual (EPI) na franxa das sete ás oito da tarde, tramo horario reservado para que voten os positivos en coronavirus e os seus contactos estreitos.

Bernat Solé, conselleiro de Acción Exterior, Relacións Institucionais e Transparencia: "De 9:00 h a 12:00 h o colectivo de risco. De 12:00 h a 19:00 h toda a cidadanía que non pertenza a ningún colectivo de risco".

Algo máis de 82.200 cidadáns foran chamados a integrar unha mesa electoral. Un de cada tres seleccionados presentara alegacións para non acudir. Moitas foron rexeitadas.
E para que todo transcorra con seguridade nesta xornada electoral, hai un amplo dispositivo preparado.
Bernat Solé, conselleiro de Acción Exterior, Relacións Institucionais e Transparencia: "Será un total de efectivos de 14.000 axentes, o dispositivo máis grande nunhas eleccións ao Parlamento de Cataluña".

Os votantes poden consultar en tempo real a través dunha aplicación de teléfono móbil se o centro de votación está moi concorrido. O Govern recomendou ademais levar o sobre e a papeleta da casa.
O temor ao coronavirus provocou que se batera un récord na solicitude de voto por correo nunhas eleccións en Cataluña. Recibíronse preto de 285.000 peticións, e votaron 265.000 persoas, un 350 por cento máis do habitual.