EFE

As protestas contra a obriga de mostrar o certificado sanitario para acceder ao posto de traballo en Italia percorreron hoxe o país, no primeiro día da súa implantación, aínda que sen chegar a paralo, só con algunhas manifestacións en portos e cidades.

Mario Draghi, primeiro ministro pero ante todo economista, non quere que o coronavirus free a recuperación este novo outono pandémico e por iso obrigou a todos os traballadores, do sector público e privado, a presentar o certificado para entrar aos seus postos.

Desde este venres, para traballar nunha oficina, un restaurante ou un taller italiano é preciso mostrar antes o coñecido como "Green Pass", que testemuña que o seu portador foi vacinado contra a COVID-19, pasou a enfermidade ou ten unha proba negativa. A medida, férrea e pioneira no continente europeo, foi aceptada pola inmensa maioría dos empregados do país, pero tamén suscitou a indignación de moitos, que hoxe protestaron aínda que sen chegar a deter Italia como prometían. 

A protesta que máis preocupación causaba era a dos estibadores de portos estratéxicos como Xénova (noroeste), preto da fronteira con Francia, ou o de Trieste (nordés), porta de acceso e saída para os camioneiros e transportistas de Europa do Leste. Neste último, onde se esperaba a maior manifestación, uns 3.000 traballadores mobilizáronse pero non obstaculizaron o paso de quen non quixeron sumarse á folga, co que a actividade do seu porto transcorreu con normalidade, só con algún atraso.