Portugal excedeu hoxe os 3.000 falecidos desde que comezou a pandemia, nunha xornada onde se rexistraron 62 vítimas mortais e se volveron a disparar os pacientes hospitalizados cun total de 2.741 ingresados. Segundo informou hoxe a Dirección Xeral de Saúde ( DGS), Portugal sumou hoxe 3.817 contaxiados de covid-19, polo que en total xa rexistrou 187.237 positivos, dos que 77.338 están activos.

A maioría dos infectados nas últimas horas rexistráronse na rexión Norte, onde foron contabilizados 2.663 novos positivos, mentres que na rexión de Lisboa houbo 736 casos na última xornada. Lisboa, O Porto e outras 119 comarcas do país atópanse en toque de queda entre as 23.00 e as 5.00 horas locais -de luns a venres- e de 13 a 5 horas as fins de semana.

Os comercios lusos destas 121 zonas de Portugal, que permanecerán en estado de emerxencia (nivel de alerta máximo) ata o 23 de novembro, teñen que pechar nese horario e só poden traballar para recollidas de produtos, mentres os residentes en Portugal só poderán saír de casa durante o toque de queda para dar un curto paseo pola súa zona residencial e unicamente en compañía das persoas coas que convivan.

Para minorar o impacto destas medidas sobre a hostalería, o primeiro ministro luso, António Costa, anunciou que establecerán un paquete de medidas para axudar o sector.