Portugal non rexistrou ningún morto por covid−19 nas últimas 24 horas, algo que só ocorrera unha vez en toda a pandemia, o 3 de agosto do ano pasado, e notificou este luns 196 contaxios. Segundo o boletín da Dirección Xeral de Saúde (DGS), o país, que ten algo máis de 10 millóns de habitantes, suma desde que empezou a pandemia 834.638 casos confirmados do virus, dos que máis de 24.600 están activos, e 16.965 mortos. Ata a data Portugal só tivera unha xornada sen mortes, o 3 de agosto.

Nos hospitais houbo un aumento do número de pacientes ingresados co virus, que ascende a 365, dezasete máis que o día anterior. A DGS tamén actualizou a incidencia a 14 días, que caeu a 70,4 casos por 100.000 habitantes (72,1 o pasado venres), mentres que o índice de transmisión Rt, que mide o número de persoas que contaxia un infectado, subiu de 0,98 a 0,99.

Portugal atópase baixo estado de emerxencia, o nivel de alerta máis alto, ata o 30 de abril e esta semana avaliarase se é necesario prorrogar a medida, que parte da iniciativa do presidente Marcelo Rebelo de Sousa. O xefe do Estado xa manifestou a súa vontade de que non teña que renovarse, pero matizou que todo dependerá da evolución do virus. Tamén se analizará se é posible avanzar o 3 de maio á última fase do desconfinamento e en que municipios, xa que os que presenten máis risco poden permanecer na fase actual ou mesmo retroceder.