O Parlamento portugués aprobou hoxe unha nova prórroga do estado de emerxencia, o nivel de alerta máis alto do país, ata o 23 de decembro, aínda que se prevé que a medida volva ser prolongada dentro de 15 días para que cubra o Nadal.

O decreto do presidente, Marcelo Rebelo de Sousa, foi aprobado cos votos a favor dos dous maiores partidos do hemiciclo, o gobernante Socialista e o Social-Demócrata (centro-dereita), e a abstención doutros grupos menores. A prórroga é por 15 días, do 9 ao 23 de decembro, xa que a Constitución portuguesa non permite renovacións por un período superior. Con todo, o xefe do Estado xa anunciou unha "nova renovación ata o 7 de xaneiro", para que o Goberno xa poida adoptar medidas e restricións para as festas do Nadal, que terá que ser sometida novamente a votación na Cámara.

O ministro de Administración Interna pediu aos portugueses durante o debate parlamentario un esforzo que permita "crear condicións para que se poida vivir o Nadal coas familias pero con precaución". "É un momento decisivo no que temos que mobilizar todo o esforzo, como na parte máis difícil dun maratón onde a esperanza de chegar a meta está a noso alcance pero as circunstancias poden facer fracasar ese esforzo colectivo", avisou. 

As medidas que estarán en vigor ata o 7 de xaneiro, incluídas as restricións específicas para Nadal, serán presentadas este sábado polo primeiro ministro, António Costa. Portugal estivo baixo estado de emerxencia entre o 19 de marzo e o 2 de maio e volveu declarar o nivel máximo de alerta o 9 de novembro.

Actualmente, aplícanse restricións aos municipios cunha incidencia a 14 días superior aos 240 casos por 100.000 habitantes, con toque de queda entre as 23:00 e as 5:00 horas. Nas localidades que superan os 480 casos de incidencia, onde se inclúen Lisboa e O Porto, as fins de semana endurécese o toque de queda, que abarca desde as 13:00 ata as 5:00 horas do día seguinte

Ademais, desde esta noite e ata a madrugada do mércores están limitados os desprazamentos a outros municipios que non estean debidamente xustificados, para evitar "escapadas" durante a ponte da Inmaculada Concepción.

Portugal notificou nas últimas 24 horas 4.935 contaxios de covid-19, a cifra máis alta da última semana, na que rexistrara unha tendencia descendente, o que eleva a 312.553 os casos totais desde que estalou a pandemia. Ademais, reportáronse 79 falecidos, polo que xa son 4.803 as persoas que morreron desde marzo.