A maioría dos países europeos aumentan as restricións de cara ao Nadal con confinamentos, peches da hostalería e da actividade non esencial. Pero hoxe chama a atención o caso de Portugal, que polo momento mantén as medidas máis laxas. O país luso vive o peor momento da segunda vaga da pandemia, pero por agora non pon límites ao número de comensais nas casas e mantén o toque de queda máis amplo de Europa.

O Goberno de António Costa non fixa un máximo de persoas para a cea de Noiteboa nin para a comida de Nadal, tampouco o fai en fin de ano. Si que hai restricións na hostalería, que non poderá acoller grupos de máis de seis persoas. A situación contrasta co resto de países europeos, onde as restricións son máis duras mesmo con confinamentos, como no caso de Alemaña.

Chama a atención que Portugal vive o momento máis duro da segunda vaga da pandemia, esta semana acadou o seu dato máis negativo, con case 5.000 novos contaxios en 24 horas; o peor segue a estar no norte da rexión e preocupa especialmente a área metropolitana do Porto.

Europa ve o Nadal como un momento de risco e endurece as medidas para as celebracións. Pola contra, o Goberno luso alivia as restricións para que as familias poidan reunirse. En principio, as celebracións nas casas non terán límite de asistentes.

O toque de queda en Portugal fíxase ás dúas da mañá, o máis amplo de Europa. A hostalería permanece aberta cun límite de seis persoas por mesa. Reino Unido prohibe as reunións de non conviventes e Países Baixos pecha a actividade non esencial no seu confinamento máis estrito. O mesmo ocorre en Alemaña, que ademais fixa en 5 o número máximo de comensais. 

O Goberno portugués pide responsabilidade e apela ao sentido cívico dos cidadáns. O primeiro ministro portugués non descarta cambios se a situación epidemiolóxica do país empeora. Nestes momentos o país vive o peor momento da pandemia desde o comezo da segunda vaga.