EFE

A portavoz nacional do BNG, Ana Pontón, anunciou este xoves que abre un período de "reflexión persoal" para decidir se se presenta ou non á reelección como líder do partido, na XVII asemblea que celebrará a formación nacionalista o próximo 7 de novembro.

Nunha conferencia de prensa, tras a primeira reunión da Executiva nacional tras a parada vacacional, Pontón non deu por feito a súa continuidade, algo que se daba por seguro ata o de agora, porque cre que é "necesario e útil" para o momento que vive o partido que se reformule a súa continuidade como líder.

"Non hai que dar nada por sentado, nin na vida nin na política, teñen que ser decisións pensadas e reflexionadas e non actuar desde a rutina", dixo, tras constatar que sabe que ten o apoio do partido e que esta reflexión "non vén porque poida haber ou non outros candidatos", xa que "calquera militante" pode optar a esa responsabilidade.

Sobre o momento para tomar esa decisión, asegurou que non marca "ningunha data", pero que o resolverá, en todo caso, antes de que remate o prazo preciso para presentar as candidaturas para a Asemblea Nacional.