CRTVG

Buscar

Piden parar de vacinar nos EUA con Janssen tras rexistrar casos de coágulos

Publicado o 13/04/2021 17:21
Piden parar de vacinar nos EUA con Janssen tras rexistrar casos de coágulos

Os Centros para o Control e a Prevención de Enfermidades dos Estados Unidos (CDC) e a Administración de Drogas e Alimentos (FDA) recomendaron este martes que se suspenda o uso da vacina de Janssen, filial da multinacional estadounidense Johnson & Johnson, tras rexistrar seis casos dun tipo de coágulo sanguíneo "raro e grave", segundo comunicou a propia axencia norteamericana.

Segundo a Axencia do Medicamento americana (FDA), ata o 12 de abril administráronse un total de 6,8 millóns de doses no país.

"Hoxe a FDA e @CDCgov emitiron unha declaración sobre a vacina (desenvolvida por) Johnson & Johnson #COVID19. Recomendamos unha pausa no uso desta vacina por precaución", asegura a axencia na súa conta de Twitter.

A FDA agrega que "a seguridade da vacinación#COVID19 é unha prioridade para o Goberno federal (de EUA), e tomamos moi en serio todos os informes de problemas de saúde posteriores á inmunización" contra a pandemia.

O anuncio da FDA e o CDC significa que todas as canles de saúde federais (lugares de vacinación masiva, centros de saúde comunitarios e similares) que administraban anteriormente a vacina de Johnson & Johnson terán que deter o proceso polo momento, segundo un funcionario federal de saúde, informa a cadea CNN.

As axencias recomendan que os estados fagan o mesmo, pero dependerá de cada un deles tomar esa decisión.

A pausa na administración da vacina produciuse tras detectarse un tipo de coágulos en sangue que non figuran na lista de posibles efectos secundarios adversos que formaban parte da autorización de uso de emerxencia para J&J polos Estados Unidos, segundo aseguran medios locais.

Polo menos unha muller morta e outra grave

Unha muller faleceu e a outra está grave dentro do seis casos de reacción adversa á vacina de Johnson & Johnson, que provocaron a decisión do Goberno estadounidense de deter as vacinacións con este produto.

Así o apuntaron responsables dos Centros para o Control e a Prevención de Enfermidades de Estados Unidos (CDC) e a Administración de Drogas e Alimentos (FDA) que compareceron nunha conferencia de prensa este martes tras anunciarse a pausa no uso desta vacina.

Os seis casos rexistrados son mulleres con idades entre os 18 e os 48 anos, e os seus síntomas producíronse entre seis e trece días despois da vacinación.

Segundo explicou o doutor Peter Marks, responsable de avaliación biolóxica e investigación da FDA, os casos rexistrados de efectos adversos sufriron un tipo raro de trombosis cerebral.

Anne Schuchat, subdirectora principal dos CDC, pediu aos cidadáns que puxeron esta vacina nas últimas dúas semanas que vixíen os seus síntomas e acudan ao médico se teñen dores fortes de cabeza, dores abdominais, dificultade para respirar ou dores nunha perna. 

Con todo, os expertos subliñan que estes casos son raros e queren que os provedores de atención médica teñan tempo para comprender cales son os posibles efectos secundarios e cal é a mellor forma de tratalos.

Nos Estados Unidos, un dos países con maiores niveis de vacinación contra a covid-19 do mundo, ademais da vacina de J&J adminístranse os soros creados por Pfizer e Moderna.