París e outros 15 departamentos de Francia entraron esta fin de semana no seu terceiro confinamento nun ano, que se vai prolongar polo menos catro semanas. Malia que limitará os movementos, será máis livián ca o de marzo e o de novembro de 2020.

Dezaseis departamentos do país, onde residen uns 21 dos case 70 millóns de cidadáns franceses, afrontan as restricións coas que o Executivo agarda frear a pandemia nun momento en que a media de contaxios roza os 25.000 diarios e a taxa de incidencia nos últimos sete días chega aos 266 casos por cada 100.000 habitantes.

Horas antes de que a medida entrase en vigor, centos de veciños de París saíron da cidade e así os ferrocarrís franceses esgotaron as prazas á venda para destinos como a Bretaña ou o País Vasco francés, que teñen menos restricións.