O reforzo das restricións non vai impedir que podamos seguir indo ó ximnasio nos 60 concellos afectados desde o vindeiro sábado polas novas medidas. Había medo no sector a ter que pechar como a hostelería, pero finalmente nestes espazos pechados vai estar permitida a práctica deportiva de forma individual e repetando sempre unha capacidade máxima do 50 por cento. Algúns empresarios din que xa se adiantaran adoptando maiores medidas de prevención.

O decreto contempla que tamén vai seguir a actividade cultural en bibliotecas, museos, teatros ou cines. Pero neste caso a capacidade máximo vai ser de 30 persoas nas salas ou de 75 se a actividade se realiza no exterior. As novas disposicións permiten ademais a apertura dos salóns de peiteado, dos centros de beleza ou do comercio en xeral cunha limitación máxima, coma no resto de Galicia, do 50 por cento da ocupación.