CRTVG

Buscar

Os usuarios de transporte marítimo e autobús poderán ocupar todos os asentos pero non comer nin falar

Publicado o 09/11/2020 20:36

• No canto de reducir a ocupación, Sanidade opta por medidas baseadas na diminución do contacto

• A actualización das restricións nestes servizos será publicada no DOG deste martes

Os usuarios de transporte marítimo e autobús poderán ocupar todos os asentos pero non comer nin falar

Os servizos de transporte marítimo e en autobús (de carácter interurbano, urbano ou de uso especial) dependentes da Xunta poderán ocupar a totalidade dos asentos aínda que se deberá manter a "máxima separación" entre os usuarios "cando o nivel de ocupación o permita".

Así mesmo, segundo unha última actualización das limitacións por parte da Consellería de  Sanidade, no caso dos vehículos e embarcacións que teñan autorizadas prazas de pé, buscarase que as persoas manteñan entre si a máxima distancia posible, para o que se establece como límite unha sexta parte das prazas de pé.

Como medidas adicionais nestes servizos, sempre que a duración sexa inferior a dúas horas, os usuarios non poderán consumir alimentos no interior dos vehículos ou embarcacións e deberán evitar, na medida do posible, consumir bebidas ou manter contactos directos con outros ocupantes.

No caso dos servizos públicos colectivos regulares de transporte de viaxeiros de carácter interurbano, de uso xeral ou especial, que non teñen autorizadas prazas de pé, e en calquera servizo de transporte marítimo en augas interiores da competencia da Xunta, será obrigatoria a expedición do billete coa identificación do servizo concreto de transporte e do vehículo ou embarcación que o preste.

Ademais, todos os anteriores vehículos e embarcacións deberán ter numerados os seus asentos de forma clara e visible e, naqueles servizos en que non exista unha asignación previa do asento, recoméndase aos viaxeiros que anoten no billete o número de praza que ocupen.

Actualización das normas no DOG deste martes

De todo iso informou este luns a Consellería de Sanidade nun comunicado no que explica que esta actualización das restricións será publicada no Diario Oficial de Galicia (DOG) deste martes.

"De acordo cos últimos estudos", Sanidade estima prioritario adoptar medidas que faciliten a trazabilidade dos usuarios dos medios de transporte de viaxeiros, polo que establece medidas dirixidas a facilitar o coñecemento das persoas que o ocupan.

Tamén sinala que, dada a limitada duración do tempo que os usuarios permanecen no interior, xunto coas adecuadas condicións de ventilación, e fronte á redución da súa capacidade, ve "adecuado" outras medidas preventivas alternativas, baseadas na "diminución do contacto directo entre os usuarios".

A Xunta asegura que busca a necesaria eficiencia do servizo público facilitando o mantemento da funcionalidade de trasladado dos usuarios para atender as necesidades relacionadas coas actividades permitidas, como as laborais ou lectivas.