Os traballadores da concesionaria do transporte público de Vigo, Vitrasa, retoman as protestas que xa iniciaron en agosto.

Reclaman unha redución da xornada laboral para os condutores, un colectivo que segundo o comité de empresa afronta unha carga de traballo excesiva. Tamén piden a regulación do descanso diario e que poidan ter as vacacións durante os meses de verán.

Afirman que están a traballar unhas 10 horas diarias con tempos de percorrido difíciles de cumprir, o cal, sumado aos atascos e ás obras na cidade, lles provoca un grande estrés ao volante. O comité denuncia incumprimentos do convenio precisamente no que se refire aos horarios e atrasos de nóminas.

Por iso convocaron estes paros parciais de luns a venres e de carácter indefinido. O comité de empresa denuncia tamén o inmobilismo do goberno vigués e lembra que o concello é o máximo responsable de que este servizo público funcione en condicións de calidade. Os sindicatos anuncian que se non lles dan solucións ampliarán os paros.