Hai sete anos apenas sabían situar Galicia nun mapa. Agora cada vez son máis os turistas rusos que elixen Galicia como destino de vacacións.

Xan González, axencia Turismo de Galicia: "A primeira vez que acudiamos as feiras pois custaba que se achegasen a nós, incluso tiñamos que saír aos corredores, parar a xente e contarlle un pouquiño que era Galicia e agora mudou complentamente a historia. Son eles os que se achegan a nós, son moitos os que xa viaxaron a Galicia os que teñen intereses concretos para coñecer máis e mellor a nosa terra". 

Nelia Ogurtsova, directora xeral de Vremia Tours: "Sempre buscamos para os nosos clientes os mellores sitios para descansar e en España ofrecemos as perlas, e Galicia é unha das mellores perlas de España".

Forman parte desta delegación axentes de viaxes dun dos principais turoperadores de Rusia.

Nelia Ogurtsova, directora xeral de Vremia Tours: "Todos están moi namorados de Galicia e queren regresar e traer aos seus clientes. Aquí podemos ofrecer todo, cultura, a mellor gastronomía do mundo, praias e moito sol".

Chegaron o día 6 e dende entón non pararon de coñecer todo o norte de Galicia. Agora toca viaxar ao sur.

Xan González, axencia Turismo de Galicia: "Van estar nas Rías Baixas, nas illas Cíes, en Ourense, en Allariz e na Ribeira Sacra".

Mellorar a nosa posición dentro dos mercados internacionais é un dos obxectivos que marca a Axencia Turismo de Galicia.