O Divina del Mar resiste, pero ten os días contados. Desde a confraría de Portosín confirmaron que vai ser desmantelado cando a investigación realice as inspeccións oportunas e mellore o tempo. Segundo o técnico de Salvamento Marítimo, ten un costado desfeito porque as mareas movérono como se fose un papel.

Técnicos de Salvamento Marítimo e Protección Civil intentaron sen éxito, pola mañá, achegarse aos depósitos para retirar o gasóleo. É agora mesmo, a prioridade.

"Non sabemos nin canto queda dentro. Aqui xa ule a gasóleo, así que o máis importante é sacar todo o posible", asegura Marcos Riestra, técnico de Salvamento Marítimo.

As condicións meteorolóxicas impediron este martes que o helicóptero Pesca I puidera comprobar se había manchas de combustible na zona. Nas praias próximas apareceron xa caixas do pescado polo Divina del Mar, que volvía de pescar cando embarrancou.