Os partidos lánzanse xa abertamente á busca do voto o vindeiro 10 de novembro. Ciudadanos e o Partido Popular apostan por alianzas de centrodereita, pero discrepan sobre como armalas. Fronte a eles, PSOE e Unidas Podemos seguen cruzando reproches sobre a culpa do fracaso da formación de goberno. Dous meses despois, reaparece Irene Montero para unha repetición electoral que pode ter como unha das poucas novidades a entrada en liza do partido de Íñigo Errejón.

Irene Montero, voceira de Unidas Podemos: "Paréceme perigoso e danme medo as cloacas do Estado, os intentos daqueles partidos tradicionais de tentar que a democracia non se abra paso. A min, que unha formación política se presente ás eleccións paréceme o máis natural en democracia".

Ciudadanos chama os españois a conxurarse contra os cálculos electorais, critica Rivera, de Pedro Sánchez.

Albert Rivera, presidente de Ciudadanos: "Dígolle ao señor Sánchez que con España non se xoga, isto non é un xogo. Non se pode xogar España aos dados. Se alguén tiña algunha dúbida, creo que imos a esta campaña con todas as dúbidas resoltas: Sánchez é o problema".

Rivera quere un pacto postelectoral co PP. Pablo Casado insiste en unirse antes para evitar o que pasou en abril.

Pablo Casado, presidente do PP: "Os partidos que diciamos que non queriamos que gobernase Pedro Sánchez teriamos maioría absoluta nas últimas eleccións. A fragmentación do voto no centro e na dereita é o maior salvavidas para Pedro Sánchez".

O Partido Socialista non teme que a xente quede na casa, pero insisten en que o principal responsable da repetición é Unidas Podemos.

José Luis Ábalos, secretario de Organización do PSOE :"Non hai ningún medo á abstención. O que non é tan entendible é que Pablo Iglesias preferise, por cuarta vez en 4 anos, boicotear a investidura dun goberno socialista e darlle esa oportunidade, esa bóla extra, á dereita".

O PSOE aspira a unha maioría que disuada a oposición, di Ábalos, de novos intentos obstrucionistas.