O sábado regresarán á residencia de maiores DomusVi de Aldán, en Cangas, os 10 internos que aínda permanecen, de xeito provisional, na residencia de tempo libre de Patos. No momento máis crítico da pandemia, a Xunta decidiu intervir a residencia e trasladados alí, tras rexistrarse varios positivos por Covid no seu centro de orixe.

Agora, tras confirmarse que seguen libres do virus, o Goberno galego autoriza o regreso ao seu centro de orixe, despois de que o luns xa o fixeran os 9 residentes da DomusVi de Barreiro, en Vigo, tamén intervida pola Xunta. Atrás quedan dous meses complicados.

Tras o regreso de todos os internos á residencia de Aldán, terán que agardar 15 días seguidos sen rebrotes para que as autoridades sanitarias autoricen de novo o réxime de visitas ao centro.