Na área sanitaria de Ferrol, pacientes usuarios de marcapasos que estean en residencias de maiores recibirán consulta nos propios centros para evitar as visitas ao hospital e reducir o risco de exposición ao coronavirus.

Persoal da unidade de marcapasos do hospital Arquitecto Marcide de Ferrol prepárase para facer seguimento de control dos pacientes que residen en centros de maiores. Fano trasladando a consulta ata os propios centros sociosanitarios, evitando así a visita ao hospital de persoas consideradas vulnerables fronte á covid-19.

Nestes momentos os desprazamentos destas consultas chegan a 31 pacientes, distribuídos entre nove residencias de maiores da área de Ferrol, entre as que figura o centro As Fragas de Pontedeume. Nas visitas aos centros extrémanse as medidas de control e limpeza.

En seis meses o servizo de cardioloxía avaliará de novo cada usuario de marcapasos para, a partir de aí, seguir a súa evolución de xeito remoto en coordinación co persoal das residencias.