CRTVG

Buscar

Trump chega ao cumio do G-7 tras agravar a guerra comercial coa China e no medio das advertencias da UE

Publicado o 24/08/2019 15:09

O presidente estadounidense, Donald Trump, chegaba a primeira hora desta tarde a Biarritz e a súa presnza vén acompañada pola polémica, despois de que onte conminara as empresas do seu país a abandonar a China.Minutos antes, o presidente do Consello Europeo, Donald Tusk, ameazaba aos Estados Unidos con represalias se decide impoñer aranceis ao viño francés e descartaba a reincorporación de Rusia ao G-7.

O presidente francés, Emmanuel Macron, será o anfitrión dun encontro que pretende recuperar o espírito multilateral do G-7, co que naceu en 1975 para tratar a crise internacional do petróleo. Agora hai outra crise de gran calado: a guerra arancelaria entre os Estados Unidos e a China, que trae incerteza e inseguridade ás relacións financeiras e comerciais internacionais.

"Eu creo que lexitimamente o que vós agardades de nós, todos, é poder asegurar a estabilidade, a seguridade e protexer a paz no mundo", sinalaba Macron a primeira hora desta tarde nun discurso institucional.

Macron actuará a partir desta tarde como anfitrión dos Estados Unidos, o Canadá, Alemaña, Italia, o Reino Unido e o Xapón. Son potencias democráticas e iso exclúe a China. Dentro dese novo espírito multilateral, o presidente galo propugnou o regreso de Rusia para retomar a idea do G-8, que rematou cando Putin ordenou a anexión de Crimea en plena crise ucraína.

Os líderes mundiais seguen chegando gradualmente a esta cidade balneario, un dos referentes vacacionais da realeza europea no pasado e logo da gran burguesía. Na axenda que teñen por diante figuran non só a recesión económica, a cuestión nuclear de Irán e a guerra de Siria, senón tamén os impostos aos xigantes de Internet, a resposta á aceleración do cambio climático, as grandes migracións, a loita contra a evasión fiscal ou a desigualdade entre homes e mulleres.

Tratarán eses e outros tamas en medio dun forte dispositivo de seguridade con 13.200 axentes despregados, aos que hai que engadir outros 3.000 ao outro lado da fronteira, en España, fundamentalmente en Euskadi.

Noticias web

24/08/2019