Comezou a campaña de ensilado da herba, que esta primavera coincide cunha importante baixada no prezo do gasóleo. A caída é de ata 25 céntimos por litro con respecto ao ano pasado, o que supón un aforro de máis de 200 euros por cada mil litros. E nun só día de traballo, un gandeiro pode consumir incluso 2.000 litros de combustible.

Susana López, administrativa dunha distribuidora de gasóleo: "Agora é a época en que xeran unha maior demanda, pois na ensilaxe é cando máis cosomen. Isto repercútelles moito, porque de comprar o litro de gasóleo a máis de 70 céntimos a compralo agora mesmo a 46 para as cooperativas son moitos cartos".

Fidel Amil, propietario dunha empresa de servizos agrícolas: "O do gasóleo foi un aforro considerable, se cadra de 350 ou 400 euros diarios. Se seguise así, pois botábanos unha man para estes meses que estivemos parados. Tan sequera aforrabamos para pagar a Seguridade Social, pero a ver o tempo que bota. Eu creo que axiña vai empezar a subir outra vez, a ver o que pasa".

Dado o baixo prezo do gasóleo, moitos gandeiros e empresas de servizos agrícolas incluso decidiron adquirir depósitos supletorios para aprovisionarse de combustible antes de que volva subir de novo.

Susana López, administrativa dunha distribuidora de gasóleo: "Incluso están comprando depósitos para ter máis existencias. É dicir, para poder acaparar gasóleo a un prezo máis baixo. Estámonos encontrando con que hai moita xente que está facendo iso".

Fidel Amil, propietario dunha empresa de servizos agrícolas: "Porque, se cadra, empeza a subir e polo menos que te pille aí con dez mil litros ou algo. Sempre aforras algo, vaia. Hai que ir mirando de ir aforrando de todos os sitios. Cun pouquiño de cada cousa a ver se imos aguantando isto, que eu creo que vai ser un duro para todos".

O barril de petróleo acaba de subir máis de 30 dólares nunha soa xornada, polo que se prevé que o gasóleo non se manteña por moito tempo no prezo actual.