Esta rúa de Perillo, no concello coruñés de Oleiros, acolle ata 12 puntos de venda de coches. É unha das zonas que concentra máis concesionarios en toda Galicia, que dan traballo a 450 persoas. Debido ao descenso nas vendas durante o ano pasado, de ata o 35 por cento con respecto a 2019, estes concesionarios decidiron unirse no Primeiro Salón do Automóbil de Oleiros. A feira ten como obxectivo reactivar un sector moi prexudicado pola sitación de pandemia.

 "É un intento de darlle vidiña a esta tendencia que estamos levando ultimamente e xerar oportunidades tanto para nós coma para os clientes", di Jesús Somorrostro

O salón ofrece vehículos novos, de quilómetro cero, seminovos e de ocasión. Ata mil unidades cunhas condicións moi vantaxosas.

 "No caso dos novos, agora mesmo, algún vehículo ten un 30% con respecto ao PVP, o prezo do coche... é moi importante, é unha cantidade interesante digamos", sinala Jesús Somorrostro

Este salón do automóbil celébrase ata o sábado. Neste primeiro día e ata media tarde, este concesionario xa realizou varias vendas.