Un elemento que marcará esta xornada electoral, a primeira vez que os galegos voten no verán, será o uso de máscaras e xeles hidroalcólicos como consecuencia das medidas de prevención da covid-19.

Máis dun cento de técnicos en prevención de riscos revisaron todos os colexios para garantir que cumpren os protocolos de seguridade habilitados en materia de saúde pública: avisos en carteis, uso de desinfectante de mans tanto á entrada como á saída e uso obrigatorio de máscara.

Os colexios dispoñen de circuítos separados de entrada e de saída para evitar aglomeracións, así como cabinas que permiten garantir o segredo do voto sen ter que tocar cortinas e bandexas para depositar o DNI e evitar calquera tipo de contacto cos integrantes das mesas.