EFE

O Xulgado de Instrución número 3 de Santiago acordou a apertura de xuízo oral no procedemento do accidente do tren Alvia sucedido o 24 de xullo de 2013 en Angrois contra o maquinista e o director de Seguridade na Circulación de ADIF no momento de posta en funcionamento da liña.

Nun auto con data deste mércores que foi notificado ás partes, o maxistrado Andrés Lago dá por formuladas as acusacións contra ambos e ordena a apertura de xuízo oral por se os feitos que se lles imputan fosen constitutivos de oitenta delitos de homicidio por imprudencia grave profesional, de 145 de lesións por imprudencia grave profesional e dun delito de danos.

O maxistrado reclama aos dous acusados e no seu caso ás aseguradoras, como responsables civís directas, ou ás entidades públicas Renfe Operadora e ADIF, como subsidiaria, que depositen unha fianza de 57,6 millóns de euros para asegurar as responsabilidades pecuniarias que poida impoñer a sentenza.