A Sala do Social do Tribunal Superior de Xustiza de Galicia (TSXG) rexeitou o recurso de reposición interposto polo Grupo Alcoa Inespal fronte ao auto ditado o 4 de novembro pola mesma Sala en que se ordena á empresa “absterse de levar a cabo calquera actuación dirixida a facer efectiva a parada das cubas”.

O TSXG, polo tanto, confirma esta resolución. Os maxistrados salientan no auto, contra o que cabe interpoñer recurso de casación ante o Tribunal Supremo, que a medida cautelar adoptada ten “un compoñente principalmente de anticipación”, xa que a consideran “imprescindible” para o caso de que, nunha hipotética declaración de nulidade do despedimento colectivo, se puidese readmitir de maneira inmediata os traballadores.

A Sala recalca que o apagado das cubas electrolíticas “aínda non sendo un proceso irreversible, ofrécese complexo, custoso e dilatado no tempo”, o cal carrexaría “graves prexuízos aos traballadores”.

Os maxistrados sinalan que “a instrumentalidade” da medida cautelar solicitada polos sindicatos está dirixida a que non se frustre a posibilidade dunha readmisión para o caso, reiteran que “hipotético”, de que recaese unha resolución favorable a unha pretensión de nulidade do despedimento.

Os xuíces entenden que a prohibición de parar as cubas era “non só necesaria, senón a medida máis proporcionada e menos lesiva ou gravosa”, á vez que subliñan que se se declarase a nulidade dos despedimentos sería “imprescindible para a continuación inmediata da actividade e a readmisión do persoal, de maneira que o que se acordou non posuiría xa natureza de medida cautelar, senón de execución do pronunciamento xudicial”. 

Xunta e Goberno central, "interese lexítimo"

Sobre a falta de lexitimación do Ministerio  de Industria, Comercio e Turismo e da Consellería de Economía, Emprego e Industria para intervir no procedemento, os maxistrados indican que no incidente de medidas cautelares solicitábase unha administración ou intervención pública de Alcoa,  personificándoo na SEPI, pero que tamén “podería afectar” as dúas administracións.

“Consideramos que, aínda cando os terceiros chamados a xuízo non son partes no contrato de traballo ou relación laboral, posúen, no caso deste procedemento de medidas cautelares, un interese lexítimo”, destaca o TSXG, á vez que subliña que a empresa interpelada é “unha industria estratéxica cuxo peche ou redución de emprego produciría un innegable e importante impacto social dada a transcendencia que, para a comarca da Mariña, supoñería o peche total ou parcial da empresa”, o cal determina “a existencia dun interese das administracións”. 

Acceso aos medios

Os xuíces tamén avalan a retransmisión da vista en directo a través de streaming, xa que lembran que ten que facilitarse “o acceso aos medios de comunicación das actuacións procesuais públicas”, sobre todo na situación actual de pandemia. Desta forma, a Sala defende que tomou a decisión para “permitir e garantir ás persoas afectadas polo conflito laboral, que noutra situación en que as condicións sanitarias fosen de normalidade poderían ter acceso á sala de vistas cos obvios límites de capacidade desta, a posibilidade de coñecer de maneira directa o que acontece no desenvolvemento da vista da comparecencia xudicial”.