O balance é moi positivo, segundo nos comentou o xefe de Cadioloxía do Hula, o doutor Carlos González Juanatey. Neste primeiro mes que funcionou o servizo as 24 horas seguidas atendéronse 22 infartados, seis deles pola noite.

Para entender a importancia do que supón este servizo para Lugo hai que lembrar que a unidade de hemodinámica funciona dende o 2014, pero só era ata as tres da tarde, de forma que se a un lle daba un infarto fóra dese horario, tíñano que derivar á Coruña, cos riscos que supón o traslado.

O ano pasado ampliouse o horario ata as dez da noite. Dende hai un mes xa funciona o servizo de hemodinámica 24 horas. Calcúlase que cada ano se atenderán unha media de 200 pacientes infartados. Juanatey destacounos a valía humana e profesional de todo o equipo de hemodinámica.