No Reino Unido acaban de abrir as urnas. 46 millóns de británicos están chamados a votar nunhas eleccións xerais marcadas pola saída da Unión Europea. Os comicios celébranse 3 anos antes do previsto polo empeño do primeiro ministro, Boris Johnson, de lograr unha maioría suficiente no Parlamento para consumar o brexit o 31 de xaneiro.

En fronte ten o laborista Jeremy Corbyn, partidario dun segundo referendo e dunha reforma radical da economía británica. As últimas enquisas vaticinan unha vitoria conservadora, aínda que sen maioría absoluta.

Serán uns comicios decisivos nun dos momentos máis complexos da historia do Reino Unido. Apostar por unha ou outra opción pode significar un cambio profundo do modelo económico e político que tivo o país nas últimas décadas.

O actual primeiro ministro e candidato conservador, Boris Johnson, claro gañador nas enquisas, propón executar un 'brexit' duro, a saída da Unión Europea o 31 de xaneiro despois de 46 anos, pero tamén do mercado común e da unión aduaneira.

En fronte ten o líder laborista, Jeremy Corbin, defensor dun brexit máis moderado, que sometería a un segundo referendo e partidario de máis gasto público, nacionalizacións e suba de impostos.

A clave será se Johnson alcanza a maioría absoluta nun Parlamento composto por 650 deputados. Precisaría, por tanto, contar con polo menos 326 escanos. Os 'tories', liderados polo primeiro ministro, contan roubarlle escanos a Corbyn en áreas 'pro-brexit' do centro e norte de Inglaterra.

Con todo, as últimas sondaxes apuntan a unha redución da vantaxe conservadora e a unha recuperación dos laboristas, o que deixaría unha Cámara dos Comúns sen dominio claro de ningunha formación. De ser así, os laboristas, os liberal-demócratas e os independentistas escoceses poderían formar unha alianza para formar un goberno alternativo.

Será clave, pois, a participación nuns comicios que por primeira vez en case cen anos se celebran nun mes de decembro. E non só pode influír nela o mal tempo previsto para hoxe. Na abstención tamén pode incidir outro dato: en Londres será de noite ás catro e media da tarde.