Máis de 1.200 peregrinos foron atendidos nos últimos dous meses dentro do programa posto en marcha pola Xunta, Contigo no Camiño. Asistiron os peregrinos en primeiros auxilios e tamén ofrecéndolles información sobre rutas, albergues e horarios

O vicepresidente primeiro da Xunta participou esta mañá nun percorrido desde O Pino para conmemorar esta experiencia piloto que durou dous meses en que patrullas móbiles e socorristas percorreron en bicicleta case 5.000 quilómetros do Camiño Francés, o que concentra máis da metade dos peregrinos. Unhas medidas, asegurou Alfonso Rueda, que contribuíron á reactivación do Camiño con máis de 133.000 compostelas entregadas no que vai de ano.

O vicepresidente presentaba onte á tarde a oferta turística do Xacobeo no Porto, ante autoridades e operadores de turismo do país veciño. Alfonso Rueda defemdeu o Xacobeo como unha oportunidade para promocionar o patrimonio conxunto de Galicia e Portugal. Tamén invitou o sector turístico luso a promocionar as rutas xacobeas e a botar man do Camiño de Santiago como motor de recuperación económica a ambos lados da fronteira. Ademais, deixaron instalada na praza da Sé do Porto a primeira mouteira do Camiño en Portugal.