O prezo da luz suporá case catro euros mais ca o domingo e oito euros máis ca o de hai unha semana. O prezo da enerxía para o mercado por xunto será de 132,65 euros o megawatt por hora de media. A alza chega tras tres días seguidos de lixeiros descensos, que coinciden na fin de semana, o cal é normal porque cae a demanda.

O pico máximo producirase ás 20:00 cun valor de 153,63. O mínimo situarase en 108,52 ás catro e media da mañá.

O prezo da enerxía non dá tregua. Aumenta de xeito case diario desde xuño e marca máximos históricos cada pouco. O peso que ten o consumo de enerxía no recibo da luz supera xa o 50 % e converteuse no cargo principal da factura mensual dos consumidores.

Agosto xa foi o mes mais caro da historia, cun prezo medio de case 106 euros o megawatt á hora. Os primeiros días de setembro marcaron de media un prezo algo superior aos 136 euros, co que triplicaron o que se pagou nos primeiros días do mesmo mes en 2020.

Os mercados do gas ameazan con continuar á alza ata polo menos a primavera de 2022. Iso, sumado á espiral alcista en que se instalaron os dereitos de emisión de CO₂, depara novas treboadas no que queda de ano.