O primeiro ministro británico, o conservador Boris Johnson, permanece ingresado nun hospital de Londres desde o domingo pola noite con síntomas "persistentes" de COVID-19, aínda que continúa "a cargo do Goberno", segundo asegurou o seu portavoz oficial.

Downing Street xa non describe a súa sintomatoloxía como "leve", tal como fixera desde que se coñeceu que estaba contaxiado, fai once días, co coronavirus, pero rexeitou ofrecer máis detalles sobre o seu estado nin sobre as probas que se lle levaron a cabo no hospital St. Thomas, parte do sistema de saúde público.

Na súa reunión diaria con xornalistas, o portavoz do xefe de Goberno recalcou que Johnson, de 55 anos, pasou unha noite "cómoda", mantén o "bo ánimo" e permanece en observación como medida de precaución. Rexeitou confirmar ou desmentir se desenvolveu pneumonía ou se necesitou ser tratado con osíxeno, e puntualizou que se ofrecerá información sobre a súa saúde cando haxa novidades e, en particular, cando reciba a alta.

O ministro de Exteriores, Dominic Raab, presidiu esta mañá a reunión diaria de seguimento da crise do coronavirus, aínda que o encontro semanal do gabinete de Executivo, que estaba previsto para mañá, martes, quedou suspendido.