O pastor da comunidade do Vao, en Poio, pide a liberdade para os 10 detidos tras os altercados do 4 de maio en que quedaron feridos dous axentes da Policía Local.

"Hai 10 persoas na prisión dende hai un mes, xa tiñan que estar na rúa", di o pastor evanxelista.

Nun vídeo publicado nas redes sociais, o voceiro da comunidade xitana do barrio denuncia racismo na detención e posterior prisión preventiva dos acusados.

"Por que non os deixan en liberdade? eu chego a pensar que pode ser racismo", asegura.

Defende que os detidos non teñen antecedentes e lembra que xa amosaron o seu arrepentimento ante as autoridades.

"Pedimos perdón, estámonos humillando en todo momento, e dixémoslle á Garda Civil e ao Concello que no poboado non se vende máis droga".

A detención dos acusados tivo lugar no Vao de Arriba o pasado 4 de maio. Axentes da Garda Civil e da Policía Local desprazáronse ata alí polo aviso dunha liorta. Ao chegaren ao poboado, foron supostamente atacados con pedras e paus.

Tras o altercado, dez persoas permanecen en prisión preventiva á espera de xuízo. Están acusados dos delitos de atentado e resistencia aos axentes da autoridade, e danos materiais.

Non foron as únicas detencións. A comezos de xuño outras 7 persoas do Vao foron detidas nunha redada no marco dunha operación antidroga.