O Parlamento de Galicia aprobou este martes, cos votos a favor de En Marea, PSdeG e BNG, e a abstención do PPdeG, a toma en consideración dunha proposición de lei do PSdeG para pedir no Congreso a transferencia das competencias de tráfico, circulación de vehículos e seguridade viaria.

Deste xeito, dáse comezo na Cámara galega a un proceso que se finalmente se aproba deberá tramitarse no Congreso, onde xa se solicitou en 2008 tal cuestión, aínda que foi rexeitada nesa Cámara polo PSOE, -naquel momento no Goberno-, coa abstención do PP.

O PPdeG volveu apelar nesta xornada á súa intención de dotar a Galicia do "máximo autogoberno" e por iso decantouse por "non impedir o trámite" parlamentario, en consonancia co acordo alcanzando a finais de xaneiro, cando os catro grupos -PPdeG, En Marea, PSdeG e BNG- acordaron na Comisión Institucional instar o Goberno estatal a negociar o traspaso de todas as competencias pendentes, despois de que Pedro Sánchez se comprometera co País Vasco á transferencia de 33 competencias.

Con todo, tal e como defendeu o deputado do PPdeG Martín Fernández Prado, no seu grupo ven prioritario conseguir a transferencia da AP-9, dotar o corpo da policía autonómica do persoal necesario e unha repartición orzamentaria por parte do Estado "xusta".

O debate sobre a admisión a trámite da transferencia, con todo, demorarase polo menos ata a próxima lexislatura do Goberno central, en tanto que o trámite parlamentario na Cámara galega podería durar máis dun ano, e en Madrid están a piques de disolverse as Cortes.

O portavoz socialista no Hórreo, Xoaquín Fernández Leiceaga, defendeu a proposta que está amparada no artigo 150.2 da Constitución, que recolle que as comunidades autónomas poidan facerse cargo de certas competencias.

Leiceaga xustificou a conveniencia do traspaso ao asegurar que permitirá mellorar a seguridade viaria, que en Galicia depende de numerosos factores específicos, como a climatoloxía, a abundancia de vías secundarias ou o número de travesías. Ademais, lembrou que a sinistralidade viaria é a principal causa de morte dos mozos galegos.

O texto da iniciativa, composto por tres artigos, pide conceder a transferencia das "facultades de execución da lexislación do Estado en materia de tráfico, circulación de vehículos e seguridade viaria", coa excepción da expedición de permisos de conducir e de circulación.

Así mesmo, marca que o exercicio destas competencias non comezará ata que non sexa efectivo o traspaso dos medios humanos e materiais que comporta e que se decidan na Comisión Mixta de Transferencias e do correspondente real decreto de traspaso.

O portavoz do PSdeG explicou que os argumentos empregados son "similares" aos utilizados hai dez anos porque desde ese momento os socialistas galegos cren que este traspaso sería "útil" para unha comunidade que presenta un índice de sinistralidade máis elevado que a media española.

Sostén por tanto que esta petición non obedece a unha cuestión "nin ideolóxica nin identitaria", senón a unha demanda racional, realizada ademais por un "defensor do Estado autonómico" que entende que "as comunidades autónomas tamén somos Estado" polo que se un traspaso se fai "dunha forma constitucional" a citada transferencia supón "tamén reforzar o Estado, e non debilitalo".

Con todo, Martín Fernández Prado sostivo que aínda que a súa formación aspira a ter "máis e maior autogoberno", ve necesario que os posibles traspasos se leven a cabo de forma ordenada e establecendo "prioridades" nun momento en que "non parece o máis oportuno presentar esta demanda cando grupos independentistas están tensionando" o modelo do Estado.

"Nós aspiramos ao máximo teito competencial", sempre que a xestión das transferencias sexa útil e sempre que vaian acompañadas do correspondente financiamento; "ningunha competencia nova sen máis financiamento", reivindicou ao entender que os traspasos "non poden ser a calquera prezo e pagando máis ca os demais".

Con esta premisa, o popular preguntouse mesmo se con esta solicitude o PSdeG quere "servir de coartada" e "botarlle unha man a Pedro Sánchez" para que poida "darlles cobertura aos 20.000 puntos" que lle demanda o presidente da Generalitat, Quim Torra.

Así, o parlamentario do BNG Luís Bará lamentou que se teña que volver debater este texto que foi aprobado no Hórreo "hai dez anos" pero que non puido seguir adiante porque "se votou unha cousa aquí e outra en Madrid", demostrando o cambio de criterio do PP e PSOE "segundo quen mande en Madrid", xa que "as sucursais" autonómicas "non mandan nada".

Nesa ocasión, lembrou Bará, foron os partidos independentistas -PNV, CIU e ERC- os que votaron a favor, o que explica as "alianzas" do Bloque cos que, dixo, realmente miran polo progreso das autonomías.

Cargou ademais contra os "dez anos perdidos" de Núñez Feijóo, xa que con el á fronte da Xunta "cero patatero de competencias en dez anos" poñendo en evidencia que "son vostedes máis españolistas que os de Madrid mesmo".

De igual forma, a parlamentaria de En Marea Carmen Santos tachou de "esquizofrenia política" o feito de defender unha proposta en Galicia e rexeitala en Madrid, todo iso marcado por "posturas interesadas e contraditorias", a pesar de que o PPdeG pediu hai pouco máis dun mes ter as mesmas competencias que País Vasco e Cataluña.

"Os intereses dos galegos quedan polo camiño moitas veces", lamentou Santos, que considera que esta petición non é nin "soberanismo nin independentismo", senón unha defensa da "plurinacionalidade pensada para as persoas, non para o diñeiro".

Dependencia

Fabiola Martínez dixo que xa a partir do mes de abril, máis de 19.000 galegos verán incrementadas as axudas á dependencia ata nun 75%.