O papa Francisco chegou este venres a Bagdad na primeira visita dun pontífice a Iraq. Durante tres días, achegarase á castigada comunidade cristiá do país, perseguida polos xihadistas do Estado Islámico tras ocupar parte do territorio durante tres anos.

O papa foi recibido ao pé da escaleira do avión polo primeiro ministro, Mustafa al Kazemi. Tras estreitar as súas mans, un neno e unha nena con traxes tradicionais ofrecéronlle flores. Nunha discreta cerimonia de benvida, como é tradicional, presentáronse as delegacións de ambos os dous Estados e soaron os himnos.

O primeiro acto oficial será a xuntanza co presidente do país, o kurdo Barham Saleh, e o discurso que pronunciará no pazo presidencial ante as autoridades e membros do corpo diplomático.

Durante a súa visita, o pontífice irá ao sur de Iraq, a Ur de los Caldeos, e ao norte, á Nínive, Mosul e Qaraqosh, destrozada polo Estado Islámico e onde se concentra a poboación cristiá que quedou reducida á metade. Tamén se desprazará a Erbil, a capital do Kurdistán, que acubillou para da comunidade que fuxía dos xihadistas.

O papa Francisco acode a Iraq para homenaxear os preto de 300.000 cristiáns que quedan no país, fronte ao millón e medio que había no ano 2003.